Sognenett til topps i nasjonal kundeservicekåring
Sognenett vann beste kundeservice innan kategorien «Breiband» under Kundeserviceprisen for 2024. Kundetenesteansvarleg Madeleine Larsen Barmen (nr.3 frå venstre) held stolt fram beviset.
- Dette var moro! At me hevdar oss i denne kåringa år etter år er ein god indikasjon på at kunden verkeleg kjem først hjå oss, seier Kundetenesteansvarleg Madeleine Larsen Barmen.
Sognenett gjekk i år heilt til topps i den veletablerte kåringa Kundeserviceprisen, i kategorien for breiband.
God kultur og trivsel på arbeidsplassen
Kundeserviceprisen er ein årleg test av kundesenter i ulike kategoriar i Noreg, gjennomført av SeeYou i samarbeid med Confex. I 2021 vann Sognenett prisen for alle kundesenter totalt, og i fjor var det 2. plass i kategorien for breiband og ein 4. plass totalt.
- Me var jo så nære i fjor. Denne kundeserviceprisen heng høgt hjå bedrifter som driv kundesenter, så det er klart det er stas å ha klatra til topps igjen i vår kategori.
Kåringa gjekk føre seg på Sentralen i Oslo, der Madeleine sjølv var til stades for å representera Sognenett.
- Kva er det som gjer at de tilsynelatande lukkast med god kundeservice? Kva er viktig for å få det til?
- Eg føler mykje handlar om kulturen i bedrifta vår. Me har ein arbeidsplass der dei tilsette trivst på jobb. Er ein nøgd og har det bra, så har ein gjerne meir å overskot og det er enklare å møta kunden med eit smil.
- Og så har me jo sjølvsagt eit fokus på at kundeservice skal vera god. Me skal vera venlege, løysingsorienterte og effektive.
- Det vesle ekstra
Konserndirektør Ole Petter Hatlevoll for digitale tenester i Sognekraft er naturlegvis ein av dei som er svært nøgd med at Sognenett nok ein gang får merksemd for god kundeservice.
Konserndirektør digitale tenester Ole Petter Hatlevoll meiner Sognenett dreg fleire fordelar av å vera eit lokalt selskap – men gjev også skryt til dei tilsette for innsatsen.
- Det finst fleire prisar i landet og ulike parameterar. Men for kundeserviceprisar er det nok denne prisen som blir mest lagt merke til. Anerkjenning som dette er med å sette både Sogn og Sognenett på kartet, og det er ei fin stadfesting på at me verkeleg verdset og meistrar god service blant våre kundar.
Han trur Sognenett som eit lokalt breibandsselskap har enkelte fordelar som gjer det enklare å vera tett på både kunde og lokalsamfunn.
- Som lokalt selskap så har me eit godt utgangspunkt for å gje det vesle ekstra til kunden, men det er klart at jobben gjer seg ikkje av seg sjølv. Difor må eg få skryta litt av dei som jobbar tettast på kundeservicen kvar einaste dag med å bli betre og finna måtar på å skapa gode opplevingar for kundane våre. Dei fortener verkeleg ein klapp på skuldra, avsluttar han.