Sognenett AS går saman med Vik IT-partnar og Voss Kommunikasjon i lanseringa av Sognenett IT, eit nytt IT-selskap som tek sikte på å dekke store delar av Sogn. Hovudkontoret blir i Sogndal, i tillegg til kontor i Vik.

Sognenett AS går saman med Voss Kommunikasjon og Vik IT-partner og etablerer dotterselskapet Sognenett IT. Framme med penn og papir, frå venstre: Roger Hovland (Dagleg leiar Voss Kommunikasjon), Ole Petter Hatlevoll (Dagleg leiar Sognenett) og Odd Inge Gjeraker (Dagleg leiar Vik IT Partnar). Bak frå venstre Grethe Hjetland, Eldar Skjeldestad Åsebø, Hilde Østbø, Tom-Erik Jensen.

- Mange små- og mellomstore bedrifter har ikkje ei eiga IT-avdeling, og den rolla ynskjer Sognenett IT å fylle. Me skal vere den lokale samarbeidspartnaren ein kan ringe dersom det oppstår eit konkret problem som skal løysast seier konstituert dagleg leiar Eldar Skjeldestad Åsebø for Sognenett IT.

Onsdag 8. februar vart papir signert, og Sognenett IT er eit faktum. Selskapet skal vere eit lokalt alternativ til bedrifter og private med IT-relaterte behov.

Åsebø fortel at dette er ei teneste som den siste tida har vorte meir og meir etterspurd hjå Sognenett sin kundebase. Han trur dette vil vere eit tilbod mange vil kunne dra god nytte av,

- I dag må kundane gjerne vere i kontakt med fleire ulike aktørar for å få hjelp til IT relaterte utfordringar. Dette kan vere alt i frå at e-posten ikkje fungera som den skal, ulike fagsystem som ikkje kommuniserer saman slik det er tenkt, eller om bedrifta er tilstrekkeleg beskytta mot eit potensielt hackerangrep. Sognenett IT ynskjer å gjere kvardagen enklare, og difor har me no vald å etablere eit heilskapleg selskap som skal ta hand om desse tenestene, seier Åsebø.

*Eldar Skjeldestad Åsebø vert konstituert dagleg leiar for det nystifta selskapet.*

Lokalt forankra verdiskaping

For å gje eit så godt og breitt tilbod som mogleg har tre lokale aktørar valt å gå saman. Sognenett AS har hatt eit historisk godt samarbeid med Vik IT-partnar, og det var naturleg for begge partar å gå saman i etableringa av nytt selskap. I tillegg kjem Voss Kommunikasjon inn med verdifull erfaring og kompetanse på fagfeltet.

- Det er så kjekt å få vere med på å skape noko meir enn me allereie har gjort. Når ein ser på moglegheitene som ligg i marknaden så er det motiverande, seier Grethe Hjetland for Vik IT-partner.

- Det har mangla eit større lokalt selskap i Sogn som kan levere tenester både på internett og IT. No er det til stades, og gler oss til å bidra som ein god samarbeidspartnar, legg Odd Inge Gjeraker i Vik IT-partar til.

Vik IT-partnar har vore ein sentral og synleg aktør i Vik, Balestrand og omegn. Eksisterande kundar kjem framleis til å bli møtt av dei same tilsette, i dei same lokale, men no under eit nytt merkenamn.

*Odd Inge Gjeraker og Grethe Hjetland har stor tru på det nye selskapet, og vil bidra med mykje kompetanse.*

Voss Kommunikasjon, representert av sogningen Roger Hovland og Tom Erik Jensen, er i dag lokalisert på Voss, og leverer til ein kundebase som strekk seg frå Voss og vidare inn i Sogn.

- Voss Kommunikasjon har hatt ein solid vekst på Voss dei siste åra. Me ser at å vere til stades lokalt er viktig, og det ynskjer me å byggje vidare på rundt om i Sogn elles. Me ynskjer å vere med vidare på den verdiskapinga som no vert skapt, og då står me sterkare når me kan slå oss saman og verte ein totalleverandør, seier Roger Hovland.

- Nokre av suksessfaktorane til Voss Kommunikasjon har vore at me har klart å samle fleire IT-tenster i eit heilskapleg tilbod, og vere det éine kontaktpunktet til kunden som gjer at ein får løyst problemet. Det ynskjer me no å ta vidare i Sognenett IT, seier Hovland.

Attraktiv arbeidsgjevar

Idéen som byrja å utfolde seg i løpet av hausten er snart klar for første test.

- Me er operative frå dag ein grunna ressursane tilgjengeleg både frå Vik IT-partnar, Voss Kommunikasjon og Sognenett. Så handlar det om å få profilert dette opp, sette ting i system, rekruttere fleire tilsette og bygge kompetansemiljø, seier dagleg leiar i Sognenett Ole Petter Hatlevoll.

Også konsernsjef Terje Bakke Nævdal i Sognekraft (t.h) deltok i feiringa etter at papira var signert. Innafor arbeidstid lyt ein halde seg til alkoholfri rabarbarasaft, men champagneglasa klinger godt likevel.

- Eg er heilt sikker på at me er ein særs attraktiv arbeidsgjevar. Dette forankra i eit utviklingsorientert og solid eigarskap, med fokus på lokal verdiskaping. Så skal me ta den tida me treng for å byggje oss opp til å verte eit slagkraftig selskap med høg kvalitet i alle ledd, seier Hatlevoll.

For spørsmål, ta kontakt med:

Eldar Skjeldestad Åsebø
Konstituert dagleg leiar, Sognenett IT
959 29 197
eldar.asebo@sognenett-it.no

Ole Petter Hatlevoll
Dagleg leiar, Sognenett AS
990 91 971

Roger Hovland
Dagleg leiar, Voss Kommunikasjon
913 75 009

Odd Inge Gjeraker
Dagleg leiar, Vik IT-partnar
91365628